ప్రఖ్యాత శాస్త్రవేత్త స్టీఫెన్ హాకింగ్ మృతి

లండన్‌: ప్రముఖ భౌతిక శాస్త్రవేత్త స్టీఫెన్‌ హాకింగ్‌(76) కన్నుమూశారు. బుధవారం ఉదయం ఆయన కేంబ్రిడ్జ్‌లోని తన నివాసంలో తుదిశ్వాస విడిచినట్లు స్టీఫెన్‌ కుటుంబ అధికార ప్రతినిధి వెల్లడించారు. ఖమా నాన్న ఈ రోజు మమ్మల్ని విడిచి వెళ్లిపోయారు. ఇది అత్యంత బాధాకరం’ అని స్టీఫెన్‌ పిల్లలు లూసీ, రాబర్ట్‌, టిమ్‌ ఓ ప్రకటనలో తెలిపారు.

స్టీఫెన్‌ పూర్తి పేరు స్టీఫెన్‌ విలియమ్‌ హాకింగ్‌. 1942 జనవరి 8న ఇంగ్లాండ్‌లోని ఆక్స్‌ఫర్డ్‌షైర్‌ కౌంటీలో జన్మించారు. కేంబ్రిడ్జ్‌ యూనివర్శిటీ నుంచి విద్యాభ్యాసాన్ని పూర్తి చేసిన స్టీఫెన్‌.. భౌతికశాస్త్రంలో అనేక పరిశోధనలు చేశారు. సాపేక్ష సిద్ధాంతం, గురుత్వాకర్షణ ఏకతత్వ సిద్ధాంతాలపై అధ్యయనాలు చేశారు. కృష్ణబిలాలు కూడా రేడియేషన్‌కు ఉత్పత్తి చేస్తాయని ధ్రువీకరించారు. దీన్నే హాకింగ్‌ రేడియేషన్ అని కూడా పిలుస్తారు.

ఐన్‌స్టీన్‌ తర్వాత అంతటి శాస్త్రవేత్త..
భౌతికశాస్త్రంలో ఐన్‌స్టీన్‌ తర్వాత అంత గొప్ప శాస్త్రవేత్తగా హాకింగ్‌ పేరుగాంచారు. కృష్ణబిలాలు, బిగ్‌బ్యాంగ్‌ సిద్ధాంతంపై ఆయన చేసిన అద్భుత పరిశోధనలు నేటి తరం శాస్త్రవేత్తలకు మార్గదర్శనం చేస్తాయి. గ్రహాంతర వాసుల ఉనికిపై చేపట్టే పరిశోధనలు మానవాళికి ముప్పుగా పరిణమిస్తాయని పలుసార్లు హెచ్చరించారు కూడా. ఖగోళ శాస్త్రంలో ఆయన చేపట్టిన పరిశోధనలు పెను విప్లవం సృష్టించాయి. ఆయన రచించిన ఖబ్రీఫ్‌ హిస్టరీ ఆఫ్‌ టైమ్‌’ బ్రిటిష్‌ సండే టైమ్స్‌లో 237 వారాలపాటు బెస్ట్‌ సెల్లర్‌గా నిలిచి రికార్డు సృష్టించింది. ఆయన రచించిన ఓ పుస్తకం కాలం కథ పేరుతో తెలుగులో కూడా వెలువడింది.

రెండేళ్లకే చనిపోతారని అనుకున్నారు..
అయితే ప్రమాదవశాత్తు ఆయన నరాల వ్యాధికి గురయ్యారు. 21ఏళ్ల వయసులోనే చక్రాల కుర్చీకే పరిమితమయ్యారు. 1963లో ఆక్స్‌ఫర్డ్‌లో చదువుకునే రోజుల్లో ఆయన శరీరంలో అనేక మార్పులు వచ్చాయి. అదే సమయంలో ఆయన ఒక రోజు మెట్ల మీద నుంచి పడిపోయారు. దీంతో పరిస్థితి మరింత తీవ్రంగా మారింది. స్టీఫెన్‌ పరిస్థితిని గమనించి కుటుంబసభ్యులు వెంటనే వైద్యులను సంప్రదించారు. ఆయన మోటార్‌ న్యూరాన్‌ వ్యాధికి గురైనట్లు వైద్యులు గుర్తించారు. దీని వల్ల శరీరం నెమ్మదిగా పక్షవాతానికి గురవుతుంది. ఆ సమయంలో ఆయన కేవలం రెండేళ్లే బతుకుతారని చెప్పారు.

అయినా కూడా స్టీఫెన్‌ కుంగిపోలేదు. విధిని ఎదిరించి చక్రాల కుర్చీ నుంచే కదలలేని స్థితిలో ఉన్నా కూడా తన పరిశోధనలు, అధ్యయనాలను కొనసాగించారు. అయితే ఆయన తిరిగి మాట్లాడటానికి మాత్రం కుదరలేదు. దీంతో చేయితో సంజ్ఞలు చేసేవారు. తాను రూపొందించిన ఓ కమ్యూనికేషన్‌ డివైజ్‌ ద్వారా ఆయన సంజ్ఞలు అక్షర రూపంలోకి మారేవి. కొన్నాళ్లకు ఆ చేయి కూడా పక్షవాతానికి గురికావడంతో 2005 నుంచి తన చెంప కండరాలతోనే కమ్యూనికేషన్‌ డివైజ్‌ను కంట్రోల్‌ చేశారు. అలా దశాబ్దాల పాటు చక్రాల కుర్చీలోనే గడిపిన స్టీఫెన్‌ బుధవారం తుదిశ్వాస విడిచారు.

స్టీఫెన్‌కు ఇద్దరు భార్యలు. కేంబ్రిడ్జ్‌లో చదువుతున్న రోజుల్లో జానే విల్డే అనే అమ్మాయితో స్టీఫెన్‌కు పరిచయం ఏర్పడింది. అప్పటికి స్టీఫెన్‌ వ్యాధి బయటపడలేదు. అయితే వ్యాధి గురించి తెలిశాక కూడా జానే పెళ్లి చేసుకునేందుకు ఒప్పుకొన్నారు. దీంతో 1965లో వీరిద్దరూ ఒక్కటయ్యారు. వీరికి ముగ్గురు పిల్లలు. అయితే కొన్ని కారణాల వల్ల 1995లో వీరి విడిపోయారు. ఆ తర్వాత అదే సంవత్సరం స్టీఫెన్‌.. ఎలైన్‌ మాసన్‌ అనే అమ్మాయిని పెళ్లిచేసుకున్నారు. 1980లో స్టీఫెన్‌ అనారోగ్యంలో ఉన్న సమయంలో మాసన్‌ ఆయనకు నర్స్‌గా పనిచేశారు. ఈ క్రమంలో వీరి మధ్య ప్రేమ చిగురించింది. అయితే 2006లో మాసన్‌తో కూడా విడిపోయారు.